ما إن أشعل سائق الميكروباص سيجارته حتي سألته وعلي وجهي ابتسامة كبيرة عن مدي استعداده للامتناع عن التدخين وما إذا كان يتمني أن يصحو يوما فيجد نفسه لا يدخن
- بس أبطل مخدرات
صمتُ مندهشا لثوان معدودة ليضيف
- بقالي يومين ماشربتش ودماغي من هنا ( ووضع السبابة والإبهام علي جانبي جبهته ) مش قادر .. يعني لو حد كلمني كلمة كدة ولا كدة أجتله .. اجتله علطول
- انت متجوز
- آه
- عندك عيال
- محسن وفاطمة
- عندهم كم سنة
- محسن تلاتة وفاطمة لسه سنة وشوية
- بتحبهم ؟
- أيوه ياعم في حد مبيحبش عياله
- بتحبهم أوي ؟
- آه أوي
- طيب متبطل مخدرات علشانهم ؟
نظر إليّ متفحصا ثم قال
- أصل الشغلانة بتاعتنا دي بنت وسخة .. أنا بأجعد 13 ساعة مكاني هنا .. فيصل تحرير رايح جاي .. انت شوف بتاخد المشوار نص ساعة ولا ساعة حتي بتبقي مش طايج نفسك
- أنا هأنزل محيي الدين أبو العز قريب ..بس عايزك توعدني انك تفكر في انك تبطل
- ماشي
- وعد
لم يجبني وضغط بقدمه علي فرامل الميكروباص ليعلن وصولي شارع محيي الدين أبو العز من ناحية شارع التحرير ، أعطيته الأجرة وسألته وأنا أفتح الباب
- انت اسمك ايه ياهندزة
- اسمي ؟! اسمي سعيد
- مع السلامة ياعم سعيد
لم يجبني ومضي في طريقه حتي آخر المشوار
ليست هناك تعليقات:
إرسال تعليق